सुपर कपमा सेमिफाइनल : आज बार्सिलोना र रियल सोसिडाड भिड्दै

काठमाडौं, पुस २९
स्पेनिस सुपर कप फुटबल प्रतियोगितामा आजदेखि सेमिफाइनलका खेल सुरु हुँदैछन् । गत सिजनदेखि सुपर कपमा पनि चार टिमलाई खेलाउन थालिएको छ । गत सिजन सुपर कप रियल मड्रिडले जितेको थियो । यसपटक पनि चार टोलीले नै उपाधिका लागि प्रतिस्पर्धा गर्नेछन् ।

आज पहिलो सेमिफाइनल खेलमा शीर्ष लिग ला लिगाका दुई टोली रियल सोसिडाड र बार्सिलोना आमनेसामने हुँदैछन् । यो खेल कार्डोबा सहरस्थित फुटबल क्लब कोर्डोबा क्लबको घरेलु रंगशालामा हुँदैछ । खेल नेपाली समयअनुसार राति ठीक १ः४५ बजेबाट सुरु हुनेछ ।

आजको खेलको विजेता टोली फाइनल पुग्ने पहिलो टिम बन्नेछ । एक खेलबाटै फाइनलको टुंगो लाग्ने हुनाले सोसिडाड र बार्सिलोना दुवै यस खेलमा जितको दबाबमा हुनेछ । यस खेलको विजेता टिमले रियल मड्रिड र एथ्लेटिक बिल्बाओबीच हुने दोस्रो सेमिफाइनलको विजेतासँग उपाधिका लागि प्रतिस्पर्धा गर्नेछ ।

बार्सिलोना र सोसिडाडबीच अन्तिम खेल केही समयअघि डिसेम्बर १७ तारिखमा ला लिगामा भएको थियो, जहाँ बार्सिलोनाले आफ्नो घरमा सोसिडाडलाई २–१ ले हराएको थियो । त्यसपछि यी दुई टोली आज राति पुनः सुपर कपमा भिड्न लागेका हुन् । आज रातिको खेलमा बार्सिलोनाका कप्तान लिओनल मेस्सीसहितका खेलाडी उत्रिनेछन् । यसअघि ला लिगामा ग्रानाडाविरुद्धको खेल दौरान दोस्रो हाफमा तिघ्राको मांशपेसीमा समस्या भएपछि मेस्सी सब्सिच्युट भएकाले आज उनले सुरुआतबाटै खेल्नेमा शंका छ ।

यता, सोसिडाडको टोलीमा पनि प्ले मेकर डेभिड सिल्भा आजको खेलमा उपलब्ध हुनेछन् । आजको खेलमा सोसिडाडका सबैजसो प्रमुख खेलाडी उपलब्ध छन् । ला लिगाको हाल अंक तालिकामा बार्सिलोना १८ खेलपछि ३४ अंकहित तेस्रो स्थानमा छ भने सोसिडाड १९ खेलपछि ३० अंकसहित पाँचौं स्थानमा छ ।

प्रकाशित मिति २९ पुष २०७७, बुधबार १२:०१