मेस्सी र भान डाइकलाई पछि पार्दै रोनाल्डोले जिते २०१९ को सर्वोत्कृष्ट खेलाडीको अवार्ड

एजेन्सी, पुस १३
इटालियन युभेन्सका पोर्चुगिज फरवार्ड क्रिस्टियानो रोनाल्डो वर्ष २०१९ का लागि पुरुष फुटबलमा वर्षकै सर्वोत्कृष्ट खेलाडी घोषित भएका छन् । आइतबार राति दुबईमा ‘बेस्ट प्लेयर अफ् द इयर २०१९’ का लागि रोनाल्डोले ‘ग्लोब सकर अवार्ड’मा छैटौंपटक बाजी मारेका हुन् ।

यो अवार्डका लागि आयोजक र फुटबल विशेषज्ञका तर्फबाट भोटिङ हुन्छ । र, सर्वाधिक अंक पाउने खेलाडी विजेता घोषित हुन्छन् । अवार्ड युरोपियन एसोसिएसन अफ् प्लेयर्स एजेन्ट नामक संस्थाले दिने गर्छ ।

यससँगै यो अवार्ड सर्वाधिक धेरै जित्नेमा रोनाल्डोले रेकर्ड बनाएका छन् । अवार्ड स्थापनाको १० वर्षमा रोनाल्डो एक्लैले कूल ६ पटक यो अवार्ड जितेका छन्, जुन सर्वाधिक हो । यो अवार्ड बार्सिलोनाका लिओनल मेस्सीले हालसम्म मात्रै एकपटक जितेका छन् ।

रोनाल्डोले यो अवार्ड पहिलोपटक सन् २०११ मा जितेका थिए । उनले पछिल्ला चार वर्ष लगातार यो अवार्डमा बाजी मारेका हुन् । मेस्सीले भने यो अवार्ड सन् २०१५ मा मात्रै जितेका थिए ।

गत सिजन रोनाल्डोले युभेन्टसमा पहिलो सिजन शानदार बनाउनेक्रममा घरेलु लिग र इटालियन सुपरकोपा जितेका थिए । यस वर्ष उनले देश र क्लबका लागि कूल ३९ गोल गरे भने पोर्चुगललाई यसै वर्ष युइएफए नेसन्स लिगको उपाधि जिताउन पनि योगदान दिए । रोनाल्डोले २०१९ को समाप्तिसँगै यो दशकमा कूल ५५५ गोल समेत पूरा गरे ।

यसपटक यो अवार्डका लागि रोनाल्डोसहित इंग्लिस क्लब लिभरपुलका मोहमद सालाह, साडियो माने, भर्जिल भान डाइक, एलिसन बेकर, म्यानचेस्टर सिटीका बर्नान्डो सिल्भा र बार्सिलोनाका लिओनल मेस्सी मनोनयनमा परेका थिए ।

प्रकाशित मिति १४ पुष २०७६, सोमबार ००:४४
Loading...