मेस्सीले ‘फिफा बेस्ट प्लेयर’ र ‘बालोन डि‘ओर’ जित्ने चार आधार

एजेन्सी, साउन १६
विश्व फुटबलको सर्वोच्च संस्था फिफाले अघिल्लो दिन ‘फिफा वर्ष खेलाडी–२०१९’ का लागि मनोनयन सार्वजनिक गर्दा स्पेनिस बार्सिलोनाका लिओनल मेस्सीसहित १० खेलाडी परेका छन् । मनोनयनमा मेस्सीबाहेक इटालियन युभेन्टसका क्रिस्यिानो रोनाल्डो, इंग्लिस क्लब लिभरपुलका भर्जिल भान डाइकलगायत रहेका छन् ।

यसपटक सो अवार्डका लागि अर्जेन्टिनी मेस्सीलाई बलियो दाबेदार मानिएको छ । त्यसैगरी, बालोन डि‘ओरका लागि पनि मेस्सीलाई दाबेदार मानिएको छ । मेस्सीका प्रतिस्पर्धी भान डाइक र रोनाल्डो छन् । यसपटक मेस्सीले फिफा वर्ष खेलाडी र बालोन डि‘ओर जित्न सक्ने केही आधारबारे चर्चा गरौं :

१. बार्सिलोनालाई ला लिगा जिताउन योगदान

हाल ३२ वर्ष पुगेका मेस्सीले गत सिजन बार्सिलोनालाई घरेलु लिग ला लिगा जिताउन प्रमुख भूमिका खेले । उनले टिमलाई च्याम्पियन बनाउन ३६ गोल गर्नुका साथै १३ गोलका लागि असिस्टसमेत गरे । मेस्सी ला लिगाबाट युरोपका टप–५ लिगमा सर्वाधिक गोलकर्ता बन्दै छैटौंपटक युरोपियन गोल्डेन बुट जित्ने खेलाडी बने ।

ला लिगामा बार्सिलोनाले अन्य टोलीलाई दबाबमा राखेर उपाधि जित्दा मेस्सीको प्रदर्शन उच्च रह्यो । उनले सबैभन्दा बढी फ्रि किक गोल गरे भने अन्य केही उल्लेख्य रेकर्ड बनाएका थिए ।

२. लगातार उच्च प्रदर्शन

गत सिजन पनि मेस्सीले विगत सिजनझैं एक लयमा प्रदर्शन गरे । केही समय चोटबाट समेत गुज्रिएका उनले गोल मात्रै गरेनन्, उल्लेख्य संख्यामा असिस्ट पनि गरे । सबैखाले प्रतियोगितामा गत सिजन उनले टोलीका लागि कूल १९ असिस्ट गरे, जुन युरोपका कुनै पनि खेलाडीले गरेको भन्दा सर्वाधिक धेरै हो ।

युरोपमा टप लिगमा गत सिजन मेस्सीको स्तरको प्रदर्शन गर्ने कोही खेलाडी थिएनन् । बार्सिलोनाले च्याम्पियन्स लिग जित्न नसके पनि उनले टिमलाई सेमिफाइनलसम्म लैजानेक्रममा उच्च प्रदर्शन गरेका थिए । गत सिजन मेस्सीले सबैखाले प्रतियोगिताबाट कूल ५१ गोल गर्दै १९ गोलम असिस्ट गरेका थिए, जुन अन्य खेलाडीको भन्दा बढी हो । गत सिजन ५० भन्दा बढी गोल गर्ने मेस्सी एक मात्रै खेलाडी हुन् ।

३. च्याम्पियन्स लिगको सर्वाधिक गोलकर्ता

गत सिजन बार्सिलोनालाई च्याम्पियन्स लिगको उपाधि दाबेदार मानिएको थियो । तर, बार्सिलोना सेमिफाइनलबाटै आउट भयो । बार्सिलोनालाई सेमिफाइनलसम्म लैजान कप्तान मेस्सीले उत्कृष्ट प्रदर्शन गरे । उनले ह्याट्रिकसहित १० खेलबाट १२ गोल गरेका थिए ।

गत सिजनभरमा कूल १२ गोल गर्दा मेस्सी चार वर्षपछि सर्वाधिक गोलकर्ता बनेका थिए । उनले प्रतियोगितामा २ गोलका लागि अस्टिसमेत गरेका थिए । प्रतियोगितामा उनले केही चर्चित र शानदार गोल गरेका थिए ।

४. कोपा अमेरिकाको प्रदर्शन

गत महिना ब्राजिलमा सकिएको कोपा अमेरिका फुटबलमा मेस्सीले अर्जेन्टिनाका लागि मात्रै १ गोल गरे । तर, उनी अर्जेन्टिनी टोलीका लागि सबैभन्दा प्रमुख खेलाडी थिए । धेरै गोल र असिस्ट नभए पनि अन्य हिसाबले मेस्सी सबैभन्दा अगाडि देखिए ।

कोपामा मेस्सीको ड्रिबलिङ, पास पूरा गर्ने खेलाडी मेस्सी नै थिए । सिंगै प्रतियोगिताभरी बढी र सफल ड्रिबल गर्ने तथा सफल पास खेल्ने खेलाडी मेस्सी नै थिए । ब्राजिलसँग सेमिफाइनलमा अर्जेन्टिना २–० ले हारे पनि सो खेलमा मेस्सीको प्रदर्शन निकै राम्रो थियो ।

भलै, अर्जेन्टिना कोपामा तेस्रो टिम मात्रै बन्यो । तेस्रो स्थानका लागि भएको खेलमा अर्जेन्टिनाले चिलीलाई २–१ ले हराएको थियो । सो खेलमा मेस्सीले रातो कार्ड पनि पाएका थिए ।

प्रकाशित मिति १६ श्रावण २०७६, बिहीबार ११:४९
Loading...