कोपा अमेरिका : उपाधिका लागि आज ब्राजिल र पेरू भिड्दै !

काठमाडौं, असार २२
ब्राजिलमा जारी कोपा अमेरिका फुटबलमा आज उपाधि भिडन्त हुँदैछ । ४६औं संस्करणको उपाधिका लागि घरेलु टोली ब्राजिल र पाहुना टोली पेरू आमनेसामने हुँदैछन् । खेल नेपाली समयअनुसार आज राति ठीक १ः४५ बजेबाट सुरु हुनेछ ।

आफ्नो भूमिमा खेलिरहेको ब्राजिल आज पेरूलाई हराएर उपाधि पोल्टामा पार्ने दाउमा छ । सन् २००७ यता यो प्रतियोगिता जित्न नसकेको ऊ यसपटक आफ्नै भूमिमा उपाधि उचाल्न चाहन्छ । जारी प्रतियोगितामा उत्कृष्ट लयमा देखिएको ब्राजिललाई पेरूभन्दा तुलनात्मक रूपमा बलियो टोली मानिएको छ ।

यता, पेरू भने आज ब्राजिललाई उसकै घरमा हराएर उपाधि चुम्ने दाउमा छ । सेमिफाइनलमा चिलीविरुद्ध ३–० को शानदार जित निकालेर फाइनल पुगेको उसले ब्राजिलसँग समूह चरणमा भोगेको हारको बदला लिने मौका छ । यसअघि समूह चरणमा पेरूलाई ब्राजिलले ५–० को लज्जास्पद हार चखाएको थियो । समूह चरणमा ब्राजिलसँग यस्तो फराकिलो हार भोगेको पेरू उपाधिका लागि त्यही ब्राजिलसँग खेल्ने हुँदा खेल थप मत्त्वपूर्ण हुने नै छ ।

‘हेड टु हेड’मा ब्राजिल र पेरू

दक्षिण अकेरिकी क्षेत्रका ब्राजिल र पेरूमा तुलनात्मक रूपमा ब्राजिल हाबी देखिन्छ । यी दुई टोलीले अन्तर्राष्ट्रिय मञ्चमा हालसम्म कूल ४५ पटक एकअर्काविरद्ध खेलेका छन् । जसमा ब्राजिलले बढी नतिजा आफ्नो पक्षमा निकालेको छ । तथ्यांक हेरौं ।

  • कूल खेल – ४५
  • ब्राजिल विजयी – ३२
  • पेरू विजयी – ४
  • बराबरी – ९

पछिल्ला पाँच खेलको नतिजा :

  • २२ जुन २०१९ – ब्राजिल ५ – ० पेरू
  • १५ नोभेम्बर २०१६ – ब्राजिल २– ० पेरू
  • १२ जुन २०१६ – ब्राजिल ० – १ पेरू
  • १७ नोभेम्बर २०१५ – ब्राजिल ३ – ० पेरू
  • १४ जुन २०१५ – ब्राजिल २ – १ पेरू

प्रकाशित मिति २२ असार २०७६, आईतवार ०८:५०
Loading...